Diksyunaryong Batangueño

Tanghod: (tang-hohd) Kahulugan: Pandiwa: Tumingin | Titigan | Bantayan Halimbawa ng pangungusap: ““Malapit nanamang magbakasyon, maghapon na naman nakatanghod ang mga bata sa telebisyon” “Kung saan saan nakatanghod si manong driver kaya nakasagi ito ng ibang sasakyan. ”

Babaysot: (bah-bai-soht) Kahulugan: Pangngalan: Babae | Dalaga Halimbawa ng pangungusap: ““Anong gaganda ga ng mga babaysot na nagsisirampa dine sa Miss Universe!”” “Are gang babaysot na are’y di na natale sa bahay eh! ”

Buyon : (boo-yon) Kahulugan: Pangngalan: Tiyan Halimbawa ng pangungusap: “Makatapos ng pasko’t bagong tao’y pahirapan nanaman magpaliit ng buyon” “Ano gang mga batang are’t kaikli ng suot, ay kita na ang mga buyon eh. ”

Miha : (mee-hâ) Kahulugan: Pang Uri: Malambot, Mahina, Mabagal, Kulang sa enerhiya Halimbawa ng pangungusap: “Mimiha-miha nanaman ang mamay, nakapangain ng ginisang balatong.” “Ano ga namang batang are? Mimiha miha eh, kala mo’y hindi nagmamadali”

Utay : (u-tahy) Kahulugan: Pang Abay: Unti Halimbawa ng pangungusap: “Utay-utay naman sa pulutan, nasa barikan ka ha? Wala sa pinik!” “Inutay-utay na nare ang pagkain sa ref eh, di na marunong magtira sa iba.”

Iwarang : (ee-wah-rahng) Kahulugan: Pang Uri: Tabinge, Hindi pantay Halimbawa ng pangungusap: “Iwarang ang mga upuan pagkatapos ng laro ng mga estudyante.” “Ano gang likot ng batang are? Di pa nakakaalis ng bahay eh iwarang na agad ang damit eh!”

Ngalngal : (ngahl-ngahl) Kahulugan: Pangngalan: Sobrang pag-iyak. Hinagpis. Halimbawa ng pangungusap: “Ngangal ang bata nung makita ang panturok na dala ng doktor.” “Napalo ng inay ang aking bunsong kapatid, ngalngal eh!”

Pangkal : (Pang-kahl) Kahulugan: Pang-Uri : Tamad Halimbawa ng pangungusap: “Napakapangkal naman ng batang are, maghuhugas lamang ng plato eh.” “Dine sa probinsya ng Batangas ay bawal ang pangkal.”